CEBU, Philippines — Ang University of the Visayas Alumni Association, Inc. (UVAAI) mopahigayon og running event alang sa dalayhgong kawsa usa ka bulan gikan karon.
Giulohan og "UVAAI Fun Run 2023", ang pasingot sa kadalanan gikatakda karong Disiembre 3. Magsugod kini ug mahuman sa UV-Main sa may dalan Colon, dakbayan sa Sugbo.
Ang kita ning aktibidad nga maoy mosikad sa selebrasyon sa ika-105 nga anibersaryo sa UV sunod tuig gamiton aron itabang sa mga iskolar sa UVAAI pagkab-ot sa ilang mga damgo.
Tataw nga makahatag kini og dugang motibasyon sa mga partisipante aron mamahimong mahinungdanon ang maong kalihukan.
"One thing I can assure is that you will feel good about running because proceeds of the run would benefit our scholars. With the excellent outcome, we can grant more scholarships," paambit pa ni UVAAI treasurer ug Gullas Law School associate dean Atty. Darling Chyrmyth Wagas-Estorgio atol sa usa ka press conference kagahapon didto sa Doña Andrea Multi-Media Center sa UV.
Si Wagas-Estorgio giduyogan nilang UVAAI secretary-general ug UV chief academic officer Dr. Anna Lou Cabuenas, UVAAI Fun Run 2023 vice chairman Dr. Cresencio "Chris" Mejarito, UVAAI Internal VP ug UV Student Affairs Services director Dr. Ma. Crispy Velasco, race organizer John Velez, ug technical director Prisciliano "Prising" Capangpangan.
Ang UVAAI Fun Run naglangkob og duha ka distansiya. Kini mao ang 3K ug 5K.
Ang rehistrasyon nagkantidad og P500 sa 3K ug P750 sa 5K apil na niini ang singlet, race bib,ug finisher's certificate.
Ang mga runners aduna say tsansa nga makadaog og maanindot nga premyo sa raffle ug ingon man makadawat og giveaways gikan sa sponsors.
Ang entry forms mahimong makuha sa UV Alumni Relations Office nga anaa mahimutang sa ground floor sa UV Administration building.