Sirius Star Pilipinas mag-tour na sab sa Pinas

CEBU, Philippines — Ang makalingaw nga mga magduduwa sa Sirius Star Pilipinas nga gipaluyohan sa Unisol ug Anytime Fitness mopahigayon na sab og Philippine Tour nga modagan og duha ka bulan.

Usa ka basketball team nga gikalangkoban og mga Amerikanong players, ang Sirius Star gi-establisar ni Albert Alocillo, kanhi CESAFI All-Star coach uban sa University of Southern Philippines Foundation (USPF) Panthers, niadtong 2018 inabagan ni team captain Anthony Winningham sa Ball Up Sporting.

"We are consistently doing tour groups in different areas of the country to play against our best talents. We also do clinics depending on the host LGUs and municipalities to help boost their local tourism as we visit them," matud pa ni Alocillo, nga nahimo sab nga interim head coach sa UST Growling Tigers sa UAAP ug sa UST-Builders Warehouse sa PBA D-League sa miaging tuig.

"Our goal is to help elevate the standard of the game we love by displaying foreign talents and share their learnings to help encourage our next generation of ballers." Si Alocillo nagkanayon nga kining mga langyaw nga players duna say makuha nga kaayuhan sa pagpakita sa ilang abilidad.

"This will expand their window to be seen in other parts of the world and get signed by teams that fit their needs," dugang pa niya. Gawas ni Winningham, ang ubang mga miyembro sa Sirius Star Pilipinas mao sila si Jaymes Savage, Jaelen Brown, Quinan Rieves, Xanthanus Pierro, Amaree Steward, Joe Vinales, Donovan Ryland, Pape Gueye, Andre Walker Jr., Leondre Townsen, ug Todd Spotswood.

Samtang sa pagsulat ning taho kagabii, ang Sirius Star nakigharong pa batok sa Balamban All-Stars didto sa Mayor Exasperanza Binghay Memorial  Cultural Center sa Balamban, Cebu.

Mopahigayon sila og clinic sa Lahug sa alas 6:30 sa gabii karong adlawa sa dili pa makigsangka batok sa San Remigio team karong Dominggo didto sa Mandaue City Cultural and Sports Complex. Unya sa Martes, duna silay scrimmage uban sa defending CESAFI champion University of the Visayas (UV) Green Lancers.

Ang Sirius Star moasdang sa Davao, Tacloban ug Manila alang sa ikaduhang bahin sa ilang tour karong Oktubre 4-18. Kabahin sa ilang iskedyul ang makigharong batok sa NCAA powerhouse San Beda Red Lions sa Oktubre 10 ug batok sa UAAP contender University of the East (UE) Red Warriors sa Oktubre 12.

Ang Sirius Star mobiyahe dayon sa Bacolod, Leyte ug mobalik sa Manila alang sa ikatulo ug katapusang leg sa ilang tour karong Oktubre 18 ngadto sa Nobiembre 1.