CEBU, Philippines — Si Charles Pepito miharos og 23 puntos uban ang 15 ka rebounds ug lima ka assists sa dihang gitumba sa AC Troopers/Eversure ang Tuburan 360 Coffee, 92-80, sa sangka tali sa mga way pildeng teams sa Balamban Fiesta Cup Inter-Commercial Invitational Basketball Tournament niadtong Biyernes sa gabii didto sa Esperanza Binghay Memorial Sports Complex sa Balamban, Cebu.
Tungod sa pagkumpleto nila og 4-0 sweep sa elimiasyon, ang AC Troopers miangkon og awtomatik nga luna sa finals sigun sa lagda sa torneyo.
Si Miguel Minguito miposte sab og double-double nga 20 puntos ug 12 ka rebounds samtang si Reed Juntilla midugang og 12 puntos, upat ka rebounds ug lima ka assists alang sa AC Troopers nga kontrolado ang duwa sukad mirehistro og 51-41 nga labaw sa halftime. Ang Tuburan nakasikit ngadto sa sayes puntos human sa tulo ka kuwarter,64-70, apan ang AC Troopers mibanat og maayo sa pinal nga 10 minutos sa aksiyon aron paglahos ngadto sa 12 puntos nga kadaogan. Si Pacsoy Oropiano mitagak og 21 puntos, upat ka rebounds ug lima ka assists alang sa Tuburan 360. Si Melvin Butohan dunay 17 puntos ug 11 ka rebounds samtang si Jiesel Tarossa midugang og 12 puntos, 16 ka rebounds ug upat ka assists apan pareho silang naminghoy gumikan kay nakatilaw sa una nilang pilde human nakasagunson og duha ka daog.
Sa laing duwa, ang EGS-Talisay City mipayaka sa Good Shepherd-Toledo City, 95-89, alang sa una nilang daog human mapakyas sa miagi nilang duha ka mga pagsuway. Si Louigie Cuyos maoy bida sa EGS-Talisay uban ang 21 puntos ug siyam ka rebounds. Nakakuha siya og dakong suporta gikan nilang Mac Racho ug Justine Dacalos nga mihipos og 15 puntos matag usa ug Richmond Bersabal nga mitimbre og 12 puntos ug siyam ka rebounds. Si Joeveil Prajes mitali og 18 puntos ug 11 ka rebounds samtang sila si Tommy Bubuli ug Jill Sereno mi-iskor og 12 puntos matag usa apan way nahimo gumikan kay ang Good Shepherd-Toledo nasugamak sa ikaduha nilang pilde sud sa tulo ka duwa.