Fishing Tournament ug 4x4 Challenge sa Tabogon mosikad

CEBU, Philippines —  Mosikad karong Mayo 13-14, 2023 ang 1st Mayor Francis Edward Salimbangon, Municipality of Tabogon Fishing Tournament ug 1st Mayor Francis Edward Salimbangon 4x4 Challenge nga pagasalmutan sa mga mahiligon sa pagpangisda ug sa mga off-road nga sakyanan.

Labing una pa kini nga kalihokan nga gihimo sa maong lungsod nga gipangulohan ni Salimbangon uban sa pakigalayon sa Reel Events & Productions sa grupo ni Vincent Ardon Villocino kansang grupo mao sab ang kaabag sa pag-organisar sa Boaters Unlimited Fishing Tournament sud na sa duha ka tuig. Sa fishing tournament, tulo kini ka kategoriya. Dili lang mga anglers ang mamahimong makaapil sa torneyo, mahimong moapil ang mga lokal nga mga mananagat sa Hand Line Category (mano-mano) aron mahimong makadaog  og dagkong premyo gamit ang ilang kaugalingong naandang fishing gears. Sunod mao ang Casting Category nga pagasalmutan sa mga anglers nga mogamit og rods ug reels ug ingon man lures, poppers, casting/micro jigs ug uban pa. Anha kini himuon sa Tabogon Port. Sa mga ganahan mopalawod, mahimong mosalmot sa Jigging Category, sama sa casting, mogamit sab ang anglers og reels ug rods ug ingon man jigs.

Ang organizers adunay gitagana nga pumpboat nga masakyan og duha ka angler, dunay libreng gasoline apan mobayad sa boat rental sa ubos nga presyo. Ang jiggers mogikan og alas-4 sa kaadlawon padung sa fishing spot nga sakop sa kadagatan sa Tabogon.

Ang casting ug handline magsugod alas-7 sa buntag. Ang tanang entries o kuha nga isda pwede na dayong ipatimbang sugod sa alas-7 sa buntag hangtud sa alas-4 sa hapon.

Ang molapas sa maong oras o mga isda nga nakuha dili pinaagi sa gilatid nga tamdanan sa tournament dili na dawaton. Ang pinakabug-at og timbang maoy mogawas nga mananaog.

Sa pikas bahin, sa 4x4 Challenge nga mahitabo niana sab adlawa duna kini duha ka kategoriya, kini ang Stock Modified Categoriy ug Expert Category.

Sa Stock Category, ang ligid kinahanglang dili molapas og 33” ang ligid, bawal ang lockers sa atubangan ug sa luyo; pwede ang slip differentials (stock o factory); opsyonal ang winch, roll bars o rool cage; apan kinahanglang mag helmet ug seatbelt ang player.

Sa Expert Category, ang ligid pwedeng lapas 33”, gitugot ang lockers (atubangan ug luyo); kinahanglang dunay winch, roll bars o roll cage, seatbelt ug helmet.

Ang matag entry kinahanglang adunay driver ug duha ka crew. Ang ubang mga guidelines ibutyag sa organizers atol unya sa duwa.

Dunay briefings sa dili pa sugdan ang duwa sa fishing ug sa 4x4 Challenge alang sa kasayuran sa tanang partisipante. Sa mga interesadong mosalmot aning maong mga torneyo mahimong magpa rehistro pinaagi sa online registration sa pinaagi niini nga links https://m.facebook.com/story.php?story_fbid=pfbid02sT6QrfAU9yas4vvq4JfV6XcJwMw56GQ9kx5nGRZw771aQKMhAjBsVHfxHWpFE9Gvl&id=100075850662357&mibextid=ZbWKwL ug https://m.facebook.com/story.php?story_fbid=pfbid02daDTazmU5BN3a4EWj5vMrua4nGiupX2nyNiyD5oYL4Aw5DAmE7B6rWj7VnXtJkkUl&id=100075850662357&mibextid=ZbWKwL.

Sa mga lokal nga mananagat nga hustong moapil sa handline category mahimong duolon si Sheena Hortelano o tawag sa telepono 09569848636. — IBM