Gabunilas WBO AsPac title ang tirada

CEBU, Philippines — Si John Paul "Angas ng Cebu" Gabunilas dunay dugang motibasyon sa dihang mokatkat siya sa ring sa labing unang higayon ning tuiga.

Og kini mao ang pagdaog og laing regional title.

Makigharong batok sa usa ka langyaw nga kontra sa labing unang higayon sa iyang karera, si Gabunilas (9-1, 6KOs) mosuway og angkon sa bakanting World Boxing Organization (WBO) Asia Pacific Youth light flyweight belt sa dihang iyang sangkaon si Wandi Priman Hulu (2-0-1) sa Indonesia sa main event sa "Engkwentro 9" nga gipasiugdahan sa ARQ Sports Promotions karong Biyernes, Marso 24, didto sa Talisay City Sports Complex.

Ang 22-anyos nga si Gabunilas, nga kasamtangang No.27 sa World Boxing Council (WBC) ratings, kanhi naghari sa OPBF Youth 108-pound division.

Karon, buot niyag idugang ang WBO AsPac nga bakus sa iyang hawak.

"Akong ikapasalig nga buhaton nako tanan ang among gi-practice ug among plano sa matag training," matud pa ni Gabunilas, nga residente na karon sa Perrelos, dakbayan sa Carcar.

"Dili lang ko mo-predict og knockout kay ga-training man pud ni akong kontra. Basta buhaton nako ang tanan kutob sa akong mahimo aron modaog aning awaya," dugang pa ni Gabunilas.

Sa supporting bouts, tulo ka mga ARQ stablemates ni Gabunilas ang mopakita'g aksiyon.

Sila si Ramil Macado, Jr.ug Berland Robles makigbinukbukay nilang Francis Jay Diaz ug Ariston Aton sa Cagayan de Oro City samtang si Angelus Pilapil makighamag ni Jay-ar Galleposo sa Zamboanga City.

Mokumbati sab sa kulbahinam nga pasundayag nga sugdan sa ala-1 sa hapon si Ronvex Capuloy sa Big Yellow Gym batok ni Junriel Jimenez sa Cebu City ingon man sila si Kit Geron Garces ug Marco Pumar sa Prime Stag Stable batok ni John Mark Hechanova sa Surigao City ug Anthony Galigao sa Bohol.