CEBU, Philippines — Ang Spartans nakasugakod sa gipaulbong 25 puntos ni Luis Fajardo aron bihagon ang Dissenters Bad Boys, 62-59, sa sangka tali sa way pildeng mga koponan sa Integrated Bar of the Philippines (IBP) Basketball League 2022 Second Conference niadtong weekend didto sa Capitol Parish Gym sa may dalan Escario, dakbayan sa Sugbo.
Tungod niini, ang Spartans nagsolo na karon sa liderato uban ang perpektong 4-0 nga marka.
Si Oliver Moeller mitagak og siyete sa iyang 13 puntos sa ikaduhang kuwarter aron tabangan ang Spartans pagposte og usa ka lugas nga bentaha sa halftime, 30-29.
Misalida sab dayon si Charles Divinagracia nga mikadlit og sayes sa iyang nuybe puntos sa ikatulong kuwarter diin giwani sa Spartans ang Dissenters, 13-5, aron inaton ang ilang labaw ngadto sa nuybe puntos, 43-34, padung sa pinal nga 10 minutos sa aksiyon.
Wala sab magpa-alkansi si Kendrick Siao nga mibubo og pito sa iyang nuybe puntos sa katapusang bahin sa aksiyon aron aswaton ang Spartans ngadto sa kulbahinam nga kadaogan.
Si Richard Bauzon mitapos uban ang 13 puntos aron abagan si Fajardo apan nakawang ang ilang paningkamot gumikan kay naputol ang tulo ka sagunson nga daog sa Dissenters.
Sa laing mga duwa, ang Revengers nakigduyog sa Dissenters sa ikaduhang dapit bitbit ang managsamang 3-1 nga baraha human gitumba ang Pañeros, 57-53, ang Gilas Defenders mipaksit sa Aniceta Vipers, 59-48, aron tablahon ang ilang record ngadto sa 2-2, samtang ang Lex Idols mipakgang sa tulo ka sunod-sunod nilang malas human gilampaso ang YLAC, 69-30.