SHAABAA Division Finals banatan na
CEBU, Philippines — Ang best-of-three Division Finals sa Sacred Heart Ateneo Alumni Basketball Athletic Association (SHAABAA) Season 25 mosikad na karong adlawa didto sa Magis Eagles Arena sa Barangay Canduman, dakbayan sa Mandaue. Sa court A, sugdan sa Cebu Landmasters Batch 2003 ug Suprea Ready Mixed Concrete Batch 2011 ang ilang kumbati alang sa kampiyonato sa Division B sa alas-4 sa hapon.
Ang Batch 2003 mi-abante human gi-sweep ang Bad Boys Wingz Batch 2007, samtang ang Batch 2011 nakakulat og ticket sa finals human gitagak ang Starkwood Properties Inc. Batch 2009. Sa ikaduhang duwa sa alas 5:30 sa hapon, ang Asian Orthopedics Batch 2014 ug Carampatana Food Corp. Batch 2012 magbugno na alang sa korona sa Division C.
Ang Batch 2014 mitaak sa final round human gipabakasyon ang SABR Solutions Batch 2018, samtang ang Batch 2012 mopabuhi sa ilang kampanya sa titulo human gipalagpot ang MPD Customs Brokerage-Winzir Batch 2013. Sa main game sa alas-7 sa gabii, ang Dynacast naglaraw nga usban og parot ang Forex Xchange 2000, Kon molampus, hayan nga motikang sila sa Division A finals.
Sa laing bahin sa court B, ang Magis Medical Fund Batch 1997 mosuway og angkon og luna sa Division A finals sa dihang engkuwentrohon nila ang AutoLAB Batch 1999 sa alas-7 sa gabii. Sa dili pa ang ilang sangka, dunay duha ka mga duwa alang sa ikatulong puwesto nga mahitabo tali sa Batch 2007 vs Batch 2009 sa Division B ug Batch 2018 vs Batch 2013 sa Division C.
- Latest
