National Drag Racing Championships sa Dapitan karong weekend
CEBU, Philippines — Human sa Grand Finals sa 2022 NCFP National Youth and Schools Chess Championships, ang dakbayan sa Dapitan didto sa Zamboanga del Norte mopahigayon na sab og laing dako nga kalihukan sa paugnat sa kusog.
Og mahitabo kini karon nang weekend.
Kini gumikan kay ang nabantog nga "Shrine City" sa Pilipinas mo-host sa 1st Mayor Bullet Jalosjos Cup National Drag Racing Championships karong Septiembre 24-25 didto sa maanindot kaayong Sunset Boulevard sa dakbayan.
Giulohan og "Dapitan 201 Speed Heroes”, ang duha ka adlaw nga lumba nga giorganisa sa MTW Racing nga gipangulohan ni Richard Te inabagan sa Dapitan City LGU ubos sa liderato ni mayor Seth Frederick "Bullet" Jalosjos naglangkob og 10 ka mga kategoriya.
Kini mao ang Suzuki Raider 25g, Suzuki Raider PCC, Suzuki Raider Carb Pure Stock, Suzuki Raider F.I. Pure Stock, 57mm Trail Bike, NMAX/Aerox CVT only, 59 Power, Open 250cc limit, Scooter Mix 125cc limit, ug Drag Diesel.
Ang kumbati sa Suzuki Raider 25g ug Suzuki Raider PCC nagsilbe sab nga qualifying tournament alang sa NGO Philippines Drag Race nga gikatakda karong Oktubre 7-9 didto sa Batangas Racing Circuit sa Rosario, Batangas. Ang mga mananaog makapahimus og all-expense paid trip sa maong karera nga gipasiugdahan sa NGO, ang primerong liga sa drag racing dinhi sa nasud.
- Latest
