Motocross ibida san Remigio mopalambo sa ilang sports tourism

CEBU, Philippines — Ang lokal nga kagamhanan sa San Remigio didto sa amihanang bahin sa Sugbo ubos sa liderato ni mayor Alfonso "Al" Pestolante mo-implementar og usa ka komprehensibong programa alang sa sports tourism dili lamang aron maila ang ilang lunsgod apan aron sab makatampo sa ekonomikanhong paglambo sa probinsiya sa Sugbo.

Mahimong sentro sa giumol nilang mga aktibidades sa paugnat sa kusog mao ang motocross gumikan kay dinhi man misikat ug unang nailhan ang ilang lungsod.

"Mao ni ang gihatagan namo og priority attention nga ma-revive kining motocross kay naila na man gyud ang among lungsod niini sa una pa tungod sa usa ka konsehal na nato karon nga si Lou Ornopia nga mao gyuy nagpasiugda niini," dason pa n Pestolante.

Giklaro hinoon ni Pestolante nga dili lang sila mopokus sa motocross racing tungod kay usa man ka "sports for all" nga inisyatiba ang ilang idalit alang sa mga katawhan sa San Remigio.

"I know daghan kaayo mi og mga potentials sa among dapit ug mao na ang plano namong i-explore by providing them with different kind of sports like basketball, volleyball, and dancesport," padayon pa ni Pestolante. "I-promote gyud namo ang sports kay buot sab namong maka-discover og mga talents gikan sa mga barangays nga hopefully mailhan ug makahatag og garbo sa among lungsod sa umaabot."

Sa iyang bahin, si Ornopia, ang giyukboan nga amahan sa Cebu motocross nga kanhi gipasidunggan nga "Sportsman of the Year" sa Sportswriters Association of Cebu (SAC), malipayon ug mapasalamaton kaayo nga gihatagan og bili ni Pestolante ang sports isip kabahin sa pagpalambo sa ilang lungsod.

"Dako akong pasalamat ni mayor Al kay iya gyud nga gihatagan og importansiya ug kinabuhi ang sports. Nindot kaayo ni nga lakang ilabi na kay ang sports dako man og papel nga gikuptan dili lamang sa paglambo apan hasta sab aron maila ang usa ka lugar. Mao nang isip sakop sa konseho, todo suporta ko niining maong programa uban ang panghinaut nga kini magmabungahon ug magmalampuson kay para man kini sa kaayuhan sa tanan," dason pa ni Ornopia.

Gawas ni Ornopia, espesyal sab nga gihisgutan ni Pestolante sila si tourism officer Ronna Bella Caayon ug PIO head Khijel Dabalos nga dako og naambag ning ilang mga plano sa sports tourism.

"Our goal is to make San Remigio as the "motocross capital of Cebu". Kini man gud ang motocross unique kaayo, dili common ba unlike sa ubang sports. Usa pa, na-establish na ni nga sport dinhi sa amoa ug among na-observe nga daghan kaayo ang manganhi nga taga laing mga lugar sa higayon nga duna mi lumba dinhi so potential kaayo nga maka-invite mi og tourists pinaagi niini mao nang amo gyud ning paluyohan," matud pa ni Caayon.

"In other sports, mopahigayon mi og mga clinics so that in the near future, ready na ang among mga atleta kon duna man gani mga tournaments nga ipahigayon ang probinsiya.Mas maayo man gud nga ato silang i-andam samtang layo pa ang kompetisyon," dugang pa ni Caayon.

Samtang si Dabalos subli nga mipadayag sa buot mahitabo ni Pestolante nga usa ka programa sa sports alang sa tanan.

"Our sports program is inclusive. As a matter of fact, we have strategically planned already how to cater those in the coastal and mountain areas to make sure that all the 27 barangays of our town will be represented. No one will be left out," batbat pa ni Dabalos.