CEBU, Philippines — Gipakaging sa Punisher ug Pfizer ang tagsa-tagsa nila ka mga karibal sa Hoop Nation Arlon Cup Season 1 niadtong weekend didto sa City Sports Club-Cebu gym.
Si Gerald Baculi mikuha og atensiyon sa dihang gitumba sa Pfizer ang KJK Reino, 75-66.
Mipupo si Baculi og 23 puntos, 14 ka rebounds ug duha ka blocks alang sa Pfizer, nga nagkupot na karon og 4-3 win-loss record. Si JR Manzanares mitali og 20 puntos apan nakawang ang iyang paningkamot gumikan kay ang KJK Reino nakatilaw sa ikaupat nilang pilde nga giatbangan og duha lamang ka daog.
Sa laing duwa, ang Punisher mipaluhod sa I.28 Realty, 69-59.
Si Julius Maraon Vidal milansang og lima ka 3-pointers sa iyang 20 puntos aron tabangan ang Punisher pagkulit sa ikatulo pa lamang nila nga daog sud sa walo ka duwa.
Si James Harold Truz dunay 15 puntos ug 14 ka rebounds apan nakawang ang iyang double-double gumikan kay ang I.28 Realty natagak ngadto sa 4-5.