CEBU, Philippines — Si Trae Young mipasud sa iyang itsa sa nahibilin nga 5.5 segundos sa duwa sa aron aswaton ang Atlanta Hawks ngadto sa makalisang nga daog batok sa Miami Heat, 111-110, sa Game 3 sa ilang best-of-seven NBA Eastern Conference first-round playoff series kagahapong adlawa.
Gumikan niini, giputlan sa Hawks ang ilang alkansi sa serye ngadto sa 2-1.
Unom ka Hawks ang mirehistro og double figures ubos sa pagpangu ni Young nga mihipos og 24 puntos.
Mitampo si Bogdan Bogdanovic og 18 puntos apil na ang tulo ka 3-pointers sa katapusang kuwarter nga nakatabang pagpalupad og balik sa Hawks human sila malubong og 16 puntos sa ikatulong kuwarter, 31-16.
Si Tyler Herro mipupo og 24 puntos samtang sila si Jimmy Butler ug Max Strus mitali og 20 puntos matag usa alang sa pilderong Heat.
Sa laing mga duwa, ang Milwaukee Bucks ug ang Phoenix Suns mi-arangkada ngadto sa 2-1 nga labaw sa tagsa-tagsa nila ka mga serye.
Gilampaso na sab sa Bucks ang Chicago Bulls, 111-81, samtang giusban og parot sa Suns ang New Orleans Pelicans, 114-111.
Si Grayson Allen maoy nangu sa Bucks uban ang 22 puntos samtang sila si Giannis Antetokounmpo ug Bobby Portis parehong miposte og 18 puntos.
Dominante kaayo ang Bucks nga sa usa ka higayon naglabaw og makabungog nga 37 puntos sa katapusang kuwarter.
Didto sa New Orleans, si Chris Paul mibubo og 15 sa iyang 23 puntos sa katapusang kuwarter uban ang 14 ka assists alang sa Suns.
Si Deandre Ayton midugang og 28 puntos ug 17 ka rebounds alang sa Suns, nga nakasugakod sa gipabuto nga 34 puntos ni Brandon Ingram sa Pelicans.