Nets mipayaka sa Heat, Sixers lider na sa East
CEBU, Philippines — Si Kevin Durant mitali og 23 puntos samtang si Seth Curry midugang og 17 puntos sa dihang gitiwasan pagpasukarap sa Brooklyn Nets ang Miami Heat, 110-95, sa NBA kagahapon didot sa FTX Arena sa Miami, Florida.
Wala sab magpabitin si Andre Drummond nga miamot og 13 puntos ug 11 ka rebounds alang sa miratsadang Nets nga midaog sa ikapitong higayon sa miagi nilang siyam ka duwa.
Samtang ang Heat nasugamak sa ikaupat nilang sagunson nga pilde ug natagak ngadto sa 47-28 hinungdan nga ang Philadelphia 76ers mao na karon ang nag-una sa liderato sa Eastern Conference uban ang 46-27 nga baraha.
Ang defending champion Milwaukee Bucks duna untay tsansa nga maka-una sa Heat ug Sixers apan napakyas kini human gilampaso sa Memphis Grizzlies, 127-102.
Si reserve guard DeAnthony Melton mi-iskor og 24 puntos samtang sila si Desmond Bane ug Dillon Brooks nagkumboya og 39 puntos aron pangulohan ang Grizzlies nga nagkupot na karon og 52-23 record nga maoy ikaduhang labing nindot ning NBA season. Si Giannis Antetokounmpo mipaulbo og 30 puntos ug 11 ka rebounds sa Bucks nga nahagsa sa 48-28 sama sa marka sa sa Boston Celtics.
Sa laing resulta, si Nikola Jokic mikadlit og 35 puntos ug 12 ka rebounds alang sa ika-25 niyang sunod-sunod nga triple-double nga nagtuboy sa Denver Nuggets ngadto sa 113-107 nga kadaogan batok sa Oklahoma City Thunder.
- Latest
