Marathon queen Joy Tabal gikasal na sa navy officer

CEBU, Philippines — Dili na maihap ang mga lumba sa dagan nga iyang gisalmotan ug nadaog dinhi sa yuta niyang natawhan ug ingon man sa langyawng lapyahan.

Gold medalist sa Southeast Asian (SEA) Games ug six-time national champion nga naghimo kaniyang rayna sa marathon sa Pilipinas, dili malalis nga nasemento na sa Sugbuanong long distance runner nga si Mary Joy Tabal ang iyang luna uban sa labing ngilngig nga mga atleta sa kasaysayan sa nasud.

Namongingi nang daan og kadungganan sa mabulokon niyang karera, ang labing unang Pinay marathoner nga nakapakita'g aksiyon sa Olympics niadtong 2016 didto sa Rio de Janiero, Brazil mi-angkon og laing dungog sa labing espesyal nga paagi.

Si Tabal, 31, mitapos sa labing dako ug mahinungdanong karera ning puntoha sa iyang kinabuhi human siya gikasal sa upat ka tuig niyang hininugma nga si navy officer Hector Dan Jimenez, 27, atol sa usa ka engrandeng seremonyas atubangan sa kapin usa ka gatos ka mga dinapit kagahapon sa buntag didto sa Chapel of San Pedro Calungsod nga anaa mahimutang sa SM Seaside City Cebu Complex sa South Road Properties (SRP).

"Here is to forever with my forever person," duwat pa ni Tabal sa iyang Facebook page. "With almost four years as couple, our relationship were tested with so many challenges, long distance relationship, network communication problems (sea duty), absence for special occasions, pandemic plus Odette and so many to mention but we are team, we are partners, and we are one."

Sa iyang bahin, si Dan nanghinaut nga ang ilang pagpanumpa ni Joy atubangan sa altar sa kaminyoon makapasilaob og maayo sa ilang kadasig ug kahinam nga moabli og bag-ong panid sa ilang kinabuhi.

"We’ve been together for almost four years and we went through a lot of things, memorable things. This new chapter of our book of life will have more thrills, challenges, experiences, memories and responsibilities that we together face and shall be blessed by our creator. I look forward to build our family while continuing our goals set together," matud pa ni Jimenez.

"We promise that we still do our passion that is to serve and bring the national colors. Nothing will change in our goal to continue the love of the game and country," dugang pa sa Lieutenant Junior Grade sa Philippine Navy.

Misaysay si Jimenez nga si Tabal mao gyud ang babaye sa iyang mga damgo ug buot niyang igahin ang nahibiling bahin sa iyang kinabuhi.

“Long before, I stayed up late looking for my future. I was looking for someone to anchor with. Some gold in the night that I could live for. But when I met Joy, she was no gold at night, she was a diamond in the morning,” paambit pa ni Jimenez.

Miangkon si Dan nga nakadayeg siya ni Joy dili lamang sa mga nakab-ot niini sa natad sa paugnat sa kusog apan hasta sab sa gipakita niining katakos sa kinabuhi taliwala sa daghang mga unos ug pagsulay nga naagian niini.

Og alang ni Dan, ang ilang kaminyoon makahatag kanila og lig-ong pundasyon sa pamilya ug maayong ugma nga buot nilang pagatukoron.

“I really see myself getting married at this point of my life. There was no pressure for me because I know that marriage is a foundation to a healthy career and progressive life goals. I am lucky that I have Joy, now as my wife, to sail through any seas that we will conquer,"dason pa ni Dan.

“We need someone to go on to after all the sacrifices we made for the service. A family that we can rely on after a long day, a wife whom we can share as we are partners. Marriage is the foundation and a start to build a family.”

Karon nga magsugod na sila pagpanday og pamilya, si Dan nagkanayon nga ang iyang asawa maoy iyang padesisyonon kon gusto pa ba niining padayonon ang iyang karera sa sports.

“I won’t stop Joy from competing. It is her call for her career as I believe that she is the captain of her own ship. Joy is a strong and independent woman," padayag pa ni Dan. "With all the struggles she conquered, she is a diamond built by hardship and pressure. I know that she can also handle family life easily.”