CEBU, Philippines — Gabaha nga premyo ang madawat sa mga mananaog sa giatngan nga “LGU Madridejos Fiesta Race 2021”, usa ka mountain bike ug road race nga gikatakda karong Disyembre 7 didto sa lungsod sa Madridejos, isla sa Bantayan.
Ang labing dako nga cycling event sa kasaysayan sa lungsod modalit og dul-an sa P60,000 nga ganting salapi kortesiya sa lokal nga kagamhanan sa Madridejos ubos sa liderato ni Mayor Salvador “Sally” De la Fuente, matud pa sa Madridejos Cycling Club (MACYC) nga maoy nag-organisa sa maong makutas nga lumba.
Gawas sa mga tropeyo, medalya ug sertipikasyon, ang top 3 sa men’s open division sa mountain bike ug road bike parehong mobulsa og P5,000, P3,000, ug P2,000.
Samtang ang top 3 sa women's open, men's 17 Under, 36-49 ug 50-above age group sa mountain bike ug 15-below category sa road race makakubra og P3,000, P2,000 ug P1,000 nga pahalipay.
Gawas niini, ang mga kampiyon sa tanang walo ka mga kategoriya makadawat sab og tagsa ka sako nga bugas, samtang kadtong makalandig sa ikaduha ug ikatulong puwesto dunay tag-15 ka kilo nga bugas.
Si konsehal Vincent Villacrusis magpa-raffle og usa ka brand new mountain bike alang sa tanang mga partisipante, samtang pipila ka mga SB members ang manghatag og mga bike aron pagdugang og kasadya sa okasyon.
Eksklusibo lamang sa mga seklista sa isla sa Bantayan nga nanglangkob sa mga lungsod sa Madridejos, Bantayan ug Sta. Fe, ang usa ka adlaw nga sinikaray usa sa mga molamas sa tinuig nga pista sa mga Lawisanon agig pagtamod sa minahal nilang patrona, ang milagrosong Inmaculada Concepcion karong Disyembre 8.