Warriors gimakmak ang Cavs

CEBU, Philippines — Si Stephen Curry mi-iskor og 20 sa iyang 40 puntos sa katapusang kuwarter aron agakon ang Golden State Warriors ngadto sa 104-89 nga demolisyon sa Cleveland Cavaliers sa NBA kagahapon.

Ang Warriors nabiyaan og 13 puntos apan nagmangtas sa pinal nga 12 minutos sa aksiyon diin ilang gilabhan ang Cavs, 36-8, aron pagkawat niini sa daog.

Pinaagi sa 17 ka sunod-sunod nga puntos pagsugod sa katapusang kuwarter, wala na molingi pa ang Warriors sukad nailog nila ang labaw, 85-81.

Si Nemanja Bjelica midugang og 14 puntos, si Andrew Wiggins dunay 12 puntos samtang si Draymond Green milangkat og 14 ka rebounds alang sa Warriors nga padayong naghari sa liderato uban ang 13-2 nga baraha.

Sa laing aksiyon, si Jimmy Butler mipabuhagay og 32 puntos sa dihang gipakaging sa Miami Heat ang Washington Wizards, 112-97, alang sa ikaupat nilang sagunson nga daog.

Si Bam Adebayo mitampo og 20 puntos samtang sila si Gabe Vincent ug P.J. Tucker 15 nagkumboya og 33 puntos alang sa Heat nga miinat sa ilang record ngadto sa 11-5.

Sa uban pang mga resulta, si Ja Morant mibugha og 28 puntos sa dihang gimakmak sa Memphis Grizzlies ang LA Clippers, 120-108, samtang si Karl-Anthony Towns mipabuto og 25 puntos ug 12 ka rebounds sa dihang gilampaso sa Minnesota Timberwolves ang San Antonio Spurs, 115-90.