CEBU, Philippines — Ang Sugbuanong National Master nga si Elwin Retanal maoy nanghawod sa 1st Riyadh Chess League Open Tournament nga gipahigayon niadtong Septiyembre 25 ngadto sa Oktubre 2.
Gihuman ni Retanal ang pito ka hugna nga kompetisyon uban ang perpektong 6.5 puntos aron langkaton ang korona.
Si Retanal, ang 1997 Philippine Junior Chess champion nga naghatag kaniya og NM title, samtang ang nagduwa uban sa Lapu-Lapu City Naki Warriors sa Professional Chess Association of the Philippines (PCAP). Mi-abante sila sa ikaduhang hugna isip No.3 seed sa Southern Division bitbit ang 7-3 win-loss record.
Sa laing bahin, si Omarsarivar Gonzales mitali og 5.5 puntos aron pagpahiluna sa ikaduhang dapit samtang sila si Samat Bakolong, Aldrin Gallardo, ug Ahmad Morsalim ang mi-okupar sa ikatulo ngadto sa ikalimang puwesto uban ang 5.0 puntos matag usa.
Si Cesar Marabulas nagsolo sa ikaunom uban ang 4.5 puntos samtang sila si Gerard Rodrigo, Richard Matibag, John Golpeo ug Augusto Abo nga parehong dunay 4.0 puntos maoy naglangkob sa top 10.