CEBU, Philippines — Nadiskaril ang giatngan untang pagbalik og away ni Oscar de la Hoya human sa dul-an 13 ka tuig nga pahuway.
Kini human ang tinamod nga “Golden Boy” nataptan sa Covid-19 nga padayong nanghasi sa tibuok kalibutan.
Si De la Hoya gikatakda unta nga makigharong ni ex-UFC light heavyweight champion Vitor Belfort sa main event sa Triller Fight Club PPV card karong Septiembre 11 didto sa Los Angeles apan napugos kini pag-atras sa away kay na-igo sa gikahadlokang virus.
Mismo si De la Hoya ang mi-tweet og video sa iyang kaugalingon nga anaa sud sa tambalanan.
“Wanted you to hear directly from me that despite being fully vaccinated, I have contracted Covid and am not going to be able to fight next weekend. Preparing for this comeback has been everything to me over the last months, and I want to thank everyone for their tremendos support,” tweet pa sa six-division world champion.
Ang 48-anyos nga si De la Hoya wala na maka-away pa sukad siya gikastigo ug gipasurender ni Manny Pacquiao human sa ikawalong hugna niadtong Disiembre 2008.
Mohulip sa dapit ni De la Hoya aron sangkaon si Belfort mao si kanhi heavyweight champion Evander Holyfield.