CEBU, Philippines — Seguradong adto mapunting ang atensiyon ni Margielyn Arda Didal gumikan kay ang Sugbuanon nga skateboard sensation mopakita na'g aksiyon sa Olympics sa labing unang higayon karong adlawa.
Ang garbo sa Barangay Lahug, Cebu City mokumbati sa women's street event sa Tokyo Olympics skateboarding sugod sa alas 7:30 karong buntag didto sa Ariake Sports Park. Si Didal, ang giyukboan nga 'golden girl' sa labing unang skateboard competition sa Asian Games ug Southeast (SEA) Asian Games, magsagubang og malisud nga tahas gumikan kay iyang banggaon ang laing 19 sa labing banggiitan nga skateboarders sa tibuok kalibutan nga gipangulohan ni Pamela Rosa sa Brazil, usa ka world champion ug duha ka higayon nga gold medalist sa prestihiyosong X Games.
Mowadwad sab ag mga kababayan ni Rosa nga sila si Rayssa Leal ug Letícia Bufoni, Aori Nishimura, Funa Nakayama, ug Momiji Nishiya sa Japan, Mariah Duran, Alana Smith, ug Alexis Sablone sa Amerika, ug Roos Zwetsloot, Candy Jacobs ug Keet Oldenbeuving sa The Netherlands.
Nakumpleto sa listahan sa mga makontra ni Didal mao sila si Hayley Wilson sa Australia, Wenhui Zeng sa China, Lore Bruggeman sa Belgium, Julia Brueckler sa Austria, Charlotte Hym sa France, Asia Lanzi sa Italy, ug Boipel Awuah sa Russia.
Ang Top 8 lamang ang mo-abante sa finals nga magsugod sa alas 11:25 sa buntag.