CEBU, Philippines — Mihimo'g "double-double" silang Pascal Siakam ug Kyle Lowry dihang ang Toronto Raptors mibuntog sa defending champion Los Angeles Lakers, 121-114 sa NBA kagahapon didto sa Staples Center sa Los Angeles, California.
Si Siakam mibagnos og 39 puntos ug mihatag og 11 ka assists, samtang si Lowry adunay 37 puntos ug 11 ka rebounds aron pangulohan ang naghaguros nga opensiba sa Raptors.
Ang star player sa Lakers nga si LeBron James mikandos og 19 puntos, pito ka rebounds ug unom ka assists sa wala pa mobalik sa locker room sa nahabiling 6:42 sa duwa. Mao kadto ang ikaduhang pagbalik og duwa ni James human napalta og 20 ka higayon tungod sa grabeng injury.
Gipakgang sa Raptors ang ilang tulo ka sunod-sunod nga pilde bisan wala sila si Fred VanVleet, OG Anunoby, Chris Boucher ug Gary Trent Jr. tungod sa ilang injuries.
Si DeAndre' Bembry miiskor og 14 puntos gikan sa bench ug ang Raptors nilabaw og 21 puntos aron tunolan ang Lakers og laing kapildihan. Si Kyle Kuzma adunay 24 puntos alang sa Los Angeles, si Anthony Davis mitampo og 12 puntos ug si Andre Drummond miabuno og 19 puntos ug 11 ka rebounds.
Human gibiyaan og 12 puntos sa first period, ang Raptors nakabawi aron moposte og 72-59 nga labaw sa halftime. Nakitkitan sa Lakers ang labaw ngadto na lang sa 10 puntos sa sayong bahin sa fourth quarter, apan si Lowry mibawos pinaagi sa iyang 8-2 run.
Si Kuzma miposa og usa ka tres sa nahabiling 58.8 segundos aron mapahakan ang labaw sa Toronto ngadto sa sayes puntos sa wala pa sila si Bembry ug Siakam mipasud sa ilang free throws aron pagselyo sa daog. Sa laing mga aksiyon, ang Portland TrailBlazers mipilde sa Boston Celtics, 129-119, ang Miami Heat mipakaging sa Charlotte Hornets, 121-111, gipaluhod sa Sacramento Kings ang Dallas Mavericks, 111-99.
Midaog sab ang New York Knicks human gilubong ang Houston Rockets, 122-97, ang Phoenix Suns mipukan sa Oklahoma City Thunder ug Philadelphia 76ers nakaipsot sa San Antonio Spurs, 113-111.