Abi nako'g nahuman na og palig-on sa ilang koponan ang Brooklyn Nets human ilang makubit si Blake Griffin gikan sa Detroit Pistons, wala pa diay.
Ning bag-ohay pa lamang, nakuha sa Nets si LaMarcus Aldridge nga mipahawa gikan sa poder sa San Antonio Spurs. Nadungagan na sab ang koleksiyon sa mga bitoon sa Nets nga kahadlokan nang daan gumikan sa presensiya nilang Kevin Durant, James Harden ug Kyrie Irving. Sa akong nahibaw-an, mao pa kini ang labing unang NBA team nga dunay lima ka aktibong All-Star players sa ilang line-up.
Dili mabangbang ug bangis kaayo ang ilang puwersa. Sa ilang plastada, dili malalis nga ang Nets maoy labing dako nga tunok sa dalan sa Los Angeles Lakers nilang LeBron James ug Anthony Davis ngadto sa pagdepensa sa ilang trono. Kini bisan pa man og nagkalig-on sab ang ilang linyada sa pag-abot ni Andre Drummond.
Sila si Harden ug Irving hait nga pares sa backcourt, samtang ang trayanggulo nilang Durant, Griffin ug Aldridge igo kaayong makasanta nilang James, Davis ug Drummond. Pwera na lang kon wa'y mayayay sa duha ka kampo, dili nako matingala pa nga ang Lakers ug ang Nets maoy mag-abot sa 2021 NBA Finals.
* * *
Ako diay mainitong pasalamat sa magtiayong Noli ug Beth Ungui sa ilang pag-abiabi nako sa ilang tindahan niadtong duna ko'y mahinungdanong gilakaw diha sa merkado sa Taboan. Salamat sa inyong kaayo. Kon gusto mo mopalit og lamian nga buwad, naa sila tanan sa NoliBeth nilang tindahan, pangitaa lang daplin sa dalan sa Taboan.