CEBU, Philippines — Nagkumboya'g 45 puntos silang Dennis Schroder ug Kyle Kuzma sa Los Angeles Lakers nga mi-rally sa fourth quarter aron pagsumpo sa bisitang Orlando Magic, 96-93 sa ilang duwa sa NBA kagahapon didto sa Staples Center sa Los Angeles, California.
Si Schroder mikandos og 24 puntos, samtang si Kuzma mihabwa og 21 puntos sa Lakers nga nakasagunson og duha daog nga wala ang ilang superstars nga sila si LeBron James ug Davis Anthony tungod sa ilang tagsa-tagsa ka injury.
Ang Lakers labaw og siyete puntos sa nahabiling tres minutos, apan ang Magic nakahigayon pagkitkit sa bentaha ngadto sa tulo sa katapusang posisyon.
May purohan unta nga mahatod ang duwa sa overtime, ugaling lang nikagar ang 3-pointer ni Otto Porter Jr.
Si Dwayne Bacon ang nangu sa Magic sa iyang 26 puntos, gisundan ni Chuma Okeke nga adunay 14 puntos.
Siyam ka higayon nga nag-usab-usab ang labaw ug katulo magtabla sa unang 13 minutos sa duwa sa wala pa ang Lakers mohimo og 17-3 run aron moposte og 39-26 nga bentaha sa nahabiling tres minutos sa second period. Ang 3-pointer ni Markieff Morris naghatag sa Lakers og 61-53 nga labaw sa wala pa ang Magics mihimo og walo ka sunod-sunod nga puntos aron pagtabla sa duwa, 61-all sa nahabiling 2:12 sa third period. Natulo nagtabla ang iskor sa maong kuwarter ug ang katapusan sa iskor nga 69-69 paingon sa fourth quarter.
Si Montrezl Harrell mitimbre og 18 puntos sa Lakers nga padayong napilit sa ikaupat nga dapit sa Western Conference standing uban ang 30-17 bitbit ang 30-17 nga baraha.