Cebu, Philippines — Ang wa'y pildeng WBA ug IBF bantamweight champion nga si Naoya 'Monster' Inoue sa Japan nagpanikad na sa iyang Las Vegas debut karong Domingo.
Si Inoue (19-0, 16KOs) gikatakda nga manalipod sa duha niya ka bakus batok sa Australyanong si Jason Moloney (21-1, 18 KOs) didto sa MGM Grand bubble.
"There are a lot of expectations, and I want to meet those expectations. I take those big expectations, and I use them as motivation and power to keep getting better with every fight," matud pa ni Inoue.
Kon modaog batok ni Moloney, buot ni Inoue nga sangkaon sunod ang karibal niyang si WBO bantamweight champion John Riel "'Quadro Alas' Casimero sa usa ka unification bout.
Sila si Inoue ug Casimero gikatakda untang magbinukbukay niadtong Abril didto sa Las Vegas, apan nasibog pipila ka higayon tungod sa pandemiya, si Top Rank promoter Bob Arum nakadesidir nga ikanselar na lang ang away.
Gikadisyama kini og maayo ni Casimero nga naglungot-lungot makaharong si Inoue ibabaw sa ring.