Brix Flores naghandum isip labing unang pro boxer sa ALA

CEBU, Philippines — Daghan og mga maanindot nga kaagi si coach Brix Flores ubos sa poder ALA Gym,  apan ang labing nakatatak sa iyang dughan mao ang dungog isip labing unang pro boxer sa ALA.

Balik lantaw sa kagahapon, si Flores nagkanayon nga una niyang nahimamat si Antonio 'Bidoy' Lopez Aldeguer, ang giyubkoan nga ALA, human siya nakadaog og bronze medal sa 10th Asian Games didto sa Seoul, South Korea niadtong 1986.

Usa ka tuig pa lamang niadto ang ALA, apan gidominar na niini ang eksena sa boksing sa nasud diin ang ilang mga boksidor, ubos sa paggiya sa amahan ni coach Brix nga si Paciano 'Noy Pacing' Flores, nangharos ug gipangpilde pa gani ang mga sakop sa Philippine team.

Mismo si Flores nahimong sakop sa national team sud sa upat ka tuig sugod niadtong 1984. Apan niadtong 1988, nakahukom siya nga anhi mag-train sa Sugbo uban sa youth team sa ALA. Ilang gipreparahan niadtong tungora ang Olympic Week National Tournament diin ang maka-gold medal morepresentar sa nasud sa Seoul Olympics.

Human sa Olympic qualifiers, si Flores misaysay nga iyang giingnan si Aldeguer nga gusto na siyang mag-pro. Nakadawat siya og positibong tubag diha-diha.

Atol sa pagbunyag kaniya og kayo isip pro nga natumong sa Sinulog festival, si Flores midaog pinaagi sa technical decision batok ni Carlos Cedeno niadtong Enero 14, 1989 didto sa Fuente Osmeña circle. Sa susamang tuig, ang uban pang pambato sa ALA nga sila si Edito Villamor, Gerry Peñalosa, Peter Cuizon ug Rey Cosep nahimo sab nga pro.

Apan si Flores wala gitadhana nga mamahimong pro boxer. Human sa unom ka away ug walo ka bulan isip pro, siya miretiro.

Kanhi head coach sa Cebu amateur boxing team ug training camp sa ALA, si Flores mitabang pagbaid sa abilidad nilang Joma Gamboa, Archie Anoos ug Ramie Dumpa sa pro level.

Sa paglanat sa iyang karera isip trainer, si Flores mao sa'y responsabli paghashas sa abilidad nilang Malcolm 'Eagle Eye' Tuñacao, Rev 'The Gentle Giant' Santillan ug Eriberto 'Yukka' Gejon Jr. nga tanan nahimong kampiyon.

Si Flores, karon 53 anyos na ug chief trainer sa Noy Pacing Flores Boxing Acamemy nga nahimutang kilid lamang sa ilang balay didto sa Barangay Alang-Alang, Mandaue City, mipaambit nga ang disiplina sa kaugalingon maoy labing imporanteng leksiyon nga iyang nakat-on sa ALA.

"Self discipline mao gyud ang importante. Kung naa ka ana, mosunod naman dayon ang tanan. Mo-training og tarong, matulog og sayo, ug dili magbisyo. Daghan ka og mabuhat basta disiplinado ka sa imong kaugalingon. Unya si sir ALA ang iyang itudlo nga mga maayo nga butang iya pud nang buhaton. Role model gyud siya pud," dugang pa ni Flores.

"Salamat kaayo sir ALA. Daghan kaayo ko og nakat-onan kadtong naa pa ko sa ALA. Daghan ko og na-meet na mga tawo, daghan ko og naabot na mga lugar. Ug ang importante kaayo, discipline, management, guidance ug leadership. Maayo kaayo si sir ALA anang tanan," panapos ni Flores.