CEBU, Philippines — Gipamulta sa PBA Commissioner's Officer og P75,000 ug ingon man gisuspenso og tulo ka duwa si Gilas Pilipinas program director Tab Baldwin gumikan sa mga komentaryo niini batok sa liga. Gipakanaog ni PBA commissioner Willie Marcial ang maong silot niadtong Martes kon usa ka adlaw human nakig-estorya kanila si Baldwin aron klaruhon ang isyu ug ingon man mangayo og despensa.
Si Baldwin nga assistant coach sab sa TNT Katropa, nakamugna og kontrobersiya human siya namahayag nga usa ka dakong sayop ang format sa PBA nga manguha og imports sa duha sa tulo niini ka komperensiya matag season.
Gibirahan sab ni Baldwin ang kalibre sa abilidad sa mga Pinoy'ng coaches ug ingon man ang kalidad sa officiating sa liga nga alang kaniya mipabor sa mga imports.
Gipalagan ni Marcial ug uban pang kadagkoan sa PBA ang negatibong mga komento ni Baldwin nga alang kanila dili makiangayon ug makadaut sa liga.
Nangayo na hinuon og pasaylo si Baldwin sa iyang gibuhat dayong ingon nga dili niya tuyo nga dauton ang liga ug nga wala lamang makuha ang ensaktong unod sa iyang mensahe. Bisan pa man niini, si Baldwin nagsagpaan gihapon og bug-at nga silot sa PBA gumikan sa gilantaw sa kinabag-an nga pagpanginsulto niyang gibuhat. (BANATNEWS)