National Academy of sports tubag sa damgo sa Pilipinas

CEBU, Philippines — Ang National Academy of Sports Act nga bag-o  pa  lang gipirmahan nga balaod ni Presidente Rodrigo Duterte tataw nga makahatag og dakong kausaban sa kalibotan sa paugnat sa kusog.

Alang nila ni Philippine Sports Commission (PSC) chairman William 'Butch' Ramirez ug Philippine Olympic Committee (POC) president Abraham 'Bambol' Tolentino, ang maong akademiya lagmit maoy tubag sa dugay nang gipangandoy sa Pilipinas nga makadaog og gold medal sa Olympics. “Yes, it will change the landscape and we are elated to see the hard work of our leaders in the Senate and Congress come to fruition with the law,” matud pa ni Ramirez.

Nagkanayon si Ramirez nga siya ug ang PSC Board andam motabang pag-implementar sa bag-ong balaod nga mohatag pagtagad dili lamang sa mga atleta nga establisado na, apan niadto sab mga bag-o pa.

Sa panahom ni Tolentino, kadtong mga sumusulbong ug linghod pang mga atleta maoy labing mabulahan ning balaudnon.

“On the grassroots and development stage, it will help a lot,” batbat pa ni Tolentino.

Ang NAS Act mohatag og full scholarships sa mga talentandong bata nga dunay dakong potensiyal sa sports. Gawas sa PSC ug POC, apil sa mopadagan niini mao ang Department of Education (DepEd).