CEBU, Philippines — Ang boksing sa Las Vegas lagmit mabalik na karong bulan sa Hunyo.
Kini gumikan kay ang Nevada State Athletic Commission (NSAC) modawat na og aplikasyon sa mga away atol unya sa ilang miting karong Mayo 27.
Ang tigum nga ipahigayon pinaagi sa telepono kay nagpabilin pa man ang social distancing sa maong lugar, maoy labing una sa NSAC sukad gisirad-an ang tanang combat sports sa Vegas niadtong Marso 14. Apil sa sabotan sa NSAC ang mga lagda kon unsa pagprotektar sa mga atleta ug ilang mga kampo sa coronavirus.
Hinuon bisan og duna na'y mga away, dili gihapon tugotan ang mga fans sa binyu.
Unang tukion sa NSAC ang hangyo ni Top Rank chairman Bob Arum nga mopahigayon og promosyon karong Hunyo 9 sa MGM Grand.