Bolick, CJ ug Kiefer sunod mga alas sa Gilas Pilipinas

CEBU, Philippines — Sa tan-aw ni kanhi Gilas Pilipinas team captain Jimmy Alapag, dunay tulo ka batan-ong basketbolista nga  mahimong bitoon sa national team sa umaabot.

Ubay-ubay man tuod ang nakita niyang talento karon, apan espesyal nga ginganlan ni Alapag sila si Robert Bolick, CJ Perez ug Kiefer Ravena nga maoy modala sunod sa    national men's basketball team.

Ang tulo kabahin sa Team Philippines nga mikumbati sa miaging FIBA World Cup didto sa China. Didto nakita ni Alapag kon unsa kahait ang abilidad ni Perez.

Gidayeg sab sa 42-anyos nga kanhi MVP sa PBA si Bolick, ang tadhang tirador sa NorthPort.

Naa sab si Ravena.

Gihulagway ni Alapag ang pointguard sa NLEX nga taas og high basketball IQ. Si Ravena mibalik sa season-ending Governors' Cup alang sa Road Warriors human magkasilbe sa 18 ka bulan nga suspensiyon nga gipahamtang kaniya sa FIBA.

Bisan pa man sa taas-taas nga pahulay, wala matay-i ang abilidad ni Ravena ug ganina gitabangan niya ang NLEX nga mahimong topseed sa playoffs.

Gitagak hinuon sila sa no. 8 seed NorthPort Batang Pier sa quarterfinals.