Kawsa ni Honoridez: Coaches, student- athletes sa UC gihataga'g ayuda

CEBU, Philippines — Taliwala sa mga hagit nga gidala ning coronavirus pandemic, ang tinamod nga table tennis coach nga si Jessica Jawad-Honoridez mihimo sa iyang kaugalingon nga usa ka instrumento sa kaayohan nga nakadasig sab sa uban nga buot motabang niadtong labing nanginahanglan ning panahon sa kalisdanan.

Si Honoridez nga mao sab ang athletic director sa University of Cebu (UC), nagkanayon nga ang ideya nga mopasiugda siya og fund-raising kalit lang misulbong sa iyang huna-huna samtang nag-atiman siya sa inadlaw niyang gimbuhaton sa ilang balay.

“Kaning wala tay laing mabuhat during the ECQ, sige ra tag panglaba, panghinlo, ligo ug luto, nakahuna-huna ko naunsa na kaha ning mga athletes karon who come from poor families. Nahatagan na ba kaha sila'g relief goods? Naa ba kaha sila'y ikapalit kon dili sila kagawas?," sumala pa ni Honoridez.

Mao kini ang hinungdan nganong siya ug ang kanhi sinaligan niyang player nga si Jennifer Jacalan nakahukom nga mag fund-raising sila pinaagi sa social media.

Bisan og si Honoridez walay social media account, ang kanhi niya mga players, tigpaluyo ug mga higala nangita og paagi aron suportahan ang iyang kawsa pinaagi sa post ni Jacalan.

Ang inisyal nga pundo nga ilang natigum igo kaayo aron ikahatag og hinabang sa kapin sa 100 ka mga atleta sa UC ug pipila ka mga coaches nga nanginahanglan sab og tabang.

“Surprisingly, daghan ang ni-support. Hygiene kits ra man unta tong akong nahuna-hunaan pag-una para sa mga athletes pero nidako man nuon siya so naghatag na lang pud mi'g rice para nila,” matud pa ni Honoridez. "I am just thankful that I have become an instrument sa uban nga gustong motabang niadtong mga nanginahanglan."          

Kadtong gusto motabang sa ilang kawsa mahimong mokontak nilang Jennifer Jacalan (0917-8849648) ug Jessica Honoridez (0917-7021818).