CEBU, Philippines — Alang ni Miami Heat pointguard Kendrick Nunn nga siya maoy angayan nga pasidunggan isip "Rookie of the Year" ning 2019-2020 NBA season ug dili ang karibal niyang si Ja Morant sa Memphis Grizzlies.
Sa dihang nahinabi sa South Florida Sun Sentinel, ang 24-anyos nga si Nunn mitumbok sa kalampusan sa ilang koponan nga maoy nag-unang hinungdan nganong tunolan siya sa maong award.
Ang Heat nagbarog karon sa ikaupat nga puwesto sa Eastern Conference bitbit ang 41-24 record, samtang ang Grizzlies ikawalo sa West uban ang 32-33 nga baraha.
Kon estatistika hinuon ang basihan, mas nindot ang mga numero ni Morant nga dunay average nga 17.6 points, 3.5 rebounds ug 6.9 assists matag duwa, samtang si Nunn adunay 15.6 points, 3.4 assists ug 2.7 rebounds matag duwa.