CEBU, Philippines – Nanganti si Mexican champion Emanuel Navarette nga maoy unang boksidor mupahamtang og knockout nga kapildihan sa Pinoy'ng si Jeo Santisima.
Si Santisima sa ALA Boxing Gym napili nga challenger ni Navarette, kinsa manalipod sa iyang WBO super bantamweight title.
Bisan og usa ka underdog, si Santisima giisip ni Navarette nga usa ka lehitimo nga kontra hinungdan nga seryosuon niya ang ilang sangka ug gusto niya nga ma-knockout ang Pinoy boksidor.
Si Santisima nagbitbit og rekord nga 19-2, 16KOs, samtang si Navarette adunay 30-1, 26KOs.
Ang sangka sa duha maoy supporting bout sa heavyweight superfight tali nila ni Deontay Wilder ug Tyson Fury karong Pebrero 22 didto sa MGM Grand sa Las Vegas, Nevada.
"I am more than ready for my fifth defense. I always prepare 100% and go out for the knockout. I know that the Filipino has never been knocked out, so then I will be the first," matud ni Navarette sa ESPN5.
Si Santisima ang ikaduhang Pinoy challenger ni Navarette sunod ni Juan Miguel Elorde, kinsa iyang gipaundang sa seventh round niadtong Septiyembre sa miaging tuig.