Sugboanon naka-silver

CEBU, Philippines — Laing Sugboanong nga si kanhi veteran runner ug karon usa na ka obstacle course athlete nga si Sherwin Managil mitunol og silver medals sa Pilipinas sa 30th Southeast Asian Games kagahapon didto sa Manila.

Sa wala pa siya misulod sa maong natad sa lumba, si Managil pirmeng mosalmot og mga fun runs ug half marathons sa Sugbo.

Kini ang unang pag-apil ni Managil sa obstacle course race sa SEA Games ug gipakita niya iyang kapaspas. Wala igsapayan ni Managil nga napilde siya kay ang misakmit sa gold medal mao ra man sab ang iyang kababayan nga si Mervin Guarte. 

Si Guarte daan na nga sakop sa national athletics team, apan miduwa siya sa obstacle race dihang  wala siya malakip sa line-up sa athletics.

Bisan og bag-o pa sila  sa maong sports, nakuha gihapon sa mga Pinoy ang ang 1-2 finish. Miokupar sa ikatulo mao ang  two-time Spartan Elite champion nga si Mohd Saddam Bin Mohd Pittli sa Malaysia.

Ang Phl Team miharos sa gold  ug silver  medals sa obstacle race human  sab si Sandi Abahan nigawas nga reyna, samtang silver medalist si Glorien Merisco. Mipunit sa bronze medal si Khamla Sorvimane sa Laos.