CEBU, Philippines —Laraw sa University of Cebu (UC) Webmasters nga pahugtan ang ilang kampanya sa Final 4 sa ilang pakigharong batok sa University of Southern Philippines Foundation (USPF) Panthers sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.
Magsangka ang duha sa alas-6:45 sa gabii.
Sa miagi nilang duwa, giusban og pilde sa Webmasters ang three-time defending champion University of the Visayas (UV) Green Lancers aron sa pagpabilin nila sa ikaupat nga puwesto uban ang 5-3 win-loss record.
Kon ugaling molampos sila pag-ihaw sa Panthers, hayan nga ang Webmasters makigsawo sa 6-3 Lancers sa ikatulong dapit sa seniors division standings.
Samtang ang Panthers nga dunay 3-7 nga baraha kinahanglan nga makigbisog maayo gumikan kay kon mapilde sa Webmasters, hingpit nang mapawong ang ilang tsansa nga moabante sa semis.
Sa juniors division, ang University of Cebu Lapu-Lapu and Mandaue (UCLM) Campus nanghinaut nga makasustinir sa ilang kainit human mikulit og makasaysayanong daog sa dihang ilang sangkaon ang Southwestern University (SWU)-Phinma Baby Cobras sa alas-5:15 sa hapon.
Human mapakyas sud sa unom ka higayon, ang UCLM milansang sa labing una nilang daog sa CESAFI sa dihang gipakuratan ang kanhi wa'y pilde nilang sister-team nga UC Baby Webmasters, 69-66 niadtong Oktubre 19.
Nangiwit hinuon gihapon ang UCLM sa standings uban ang 1-6 nga marka. Hingpit na sab silang natagak sama sa Baby Cobras nga duha pa'y daog sud sa walo ka duwa.