CEBU, Philippines — Mitungtung sa ikatulong dapit sa international rankings sa World Pool-Billiards Association ang Cebuana nga si Rubilen Amit.
Si Amit, kinsa ang labing unang Pinay nga nahimong world champion, mitigom og 10,573 puntos nga mibutang kaniya sa top three sa tibuok kalibutan.
Ang pagsulbong ni Amit sa rankings nagikan sa nindot niyang mga gipakita sa miaging 2019 China Open ug 9-ball World Cup.
Si Amit nagsunod sa billiard superstars nga si Yu Han ug Chen Siming kinsa anaa sa una ug ikaduhang dapit.
Si Yu adunay 12,180 points, samtang gamay ra og labaw si Chen ni Amit sa iyang 10,720.
Ang resulta sa rankings makapagana ni Amit kinsa laraw nga muhakot og gold medals alang sa nasud sa nagsingabot nga Southeast Asian Games sa Nobiyembre.
Si Amit maoy 2-time World 10-ball ladies champion niadtong tuig 2009 ug 2013.