Tolotolo pabiling hari; Polog kampiyon usab

CEBU, Philippines — Ang Tolotolo nagsandig sa pagkamabayanihon ni Jessie Bathan aron bihagon ang Garing, 90-87, ug pagpabiling kampiyon sa SK juniors category B sa 10th Mayor Alegado Cup Inter-Barangay Fiesta Basketball League didto sa Consolacion Sports Complex.

Si Bathan miabuto og 31 puntos alang sa Tolotolo, nga mibanat og maayo ang naghinapos nga minutos sa sikit kaayong aksiyon aron pag-eskapo niini ngadto sa tres puntos nga kadaogan.

Gumikan sa dalaygon niyang salida, si maoy gibayaw nga Most Valuable Player.

Naka-angkon hinoon si Bathan og igong suporta gikan nilang Rhanzel Quijano ug Jay Harold Herbieto nga nagkumboya og 37 puntos.

Si Von Xyle Tundag dunay 22 puntos samtang si Clyde Alin miamot og 12 puntos sa pilderong kawsa sa Garing.

Sa laing bugno sa kampiyonato, ang Polog nag-agi usa og makuyaw nga dalan sa wala pa makaipsot batok sa Garing, 84-82, aron sakmiton ang titulo sa midgets category B.

Kulbahunam kaayo ang kumbati sa duha ka kampo gikan sa pagsugod hangtud sa hilimatyong segundos apan ang Polog ni coach Macr Bryan Flores mipakita og igong katakos sa krusyal nga bahin sa duwa aron pagkuot niini og dos punot nga daog.

Si Shannon Capangpangan nagmangtas og maayo aron pagkadlit niini og 36 puntos hinungdan nga siya maoy gibayaw nga Most Valuable Player.

Naka-angkon hinoon si Capangpangan og igong suport gikan nilang Florence Alipan, Ben Carlo Akin ug Marvin Peñas nga nagkumbinar og 36 puntos.

Si Gabriel Alin milansang og 25 ountos samtang sila si Jubrix Casag ug Jomer Gubalane mitali og 15 ug 12 puntos sa pilderong Garing.

Sa seniors category A, si Lymuel Malagar mipabuto og 30 puntos ug si Jan Haniel Abinales midugang og 20 sa dihang gipalayas sa Poblacion Oriental sa ilang trono ang two-time defending champion Pulpogan, 89-86.