CEBU, Philippines — Ang Power Forty Christmas League 2019 gikatakdang sugdan karong Septiyembre 21 diha sa Inayawan Sports Complex.
Pito gihapon ka teams ang magtigi sa korona ning upat ka bulan nga torneyo nga pagaduwaon lang matag Martes sa gabii.
Pangulohan kini sa Water Market ni Vez Eleguin nga bag-o lang na-grandslam.
Laing koponan nga mangahas pagpalagpot sa haring gangis Water Market sa ilang trono mao ang Stronghold Insurance ni Atty. Flor Yosores, AMBL Enterprises and Advertising ni Allan Lim, LJR Ventures ni Engr. Edwin Rabaya, SGRB Mariners ni Roger Gadiano, Team Rama ni Romy Rama ug Team Sanchez ni Gastner Sanchez.
Mosubay sila og single round robin sa elimination diin ang Top 2 teams awtomatik nga moabante sa semifinals.
Ang No. 3 hangtod sa No. 6 moagi pa sa quarterfinals round. Ang modaog maoy mosulod sa semifinals.
Ang mopatigbabaw sa semifinals maoy magsangka sa kampiyonato, samtang ang mga pildero magtigi sa ikatulong dapit.
Ang umaabot nga liga gimugna ni El Presidente ug CESAFI head referee Edwin Dejacto Sr. inabagan sa tanang opisyales ug mga miyembro sa Power Forty ballclub.