CEBU, Philippines – Kon sila ang pabut-on, pipila ka haligi sa Team Pacquiao ang gusto nga ang kanhi duha ka kampiyon nga sila si Danny Garcia ug Mikey Garcia ang sangkaon sa Pinoy ring icon sa sunod niining saka sa ring sunod tuig.
Human sa 'split decision' nga kadaogan ni Manny Pacquiao batok ni Keith Thurman niadtong Domingo, daling milutaw ang mga pangan nila ni IBF champion Errol Spence ug WBC king Shawn Porter sa mga posibleng iparang sunod ni Pacquiao.
Hinuon, sila si head trainer Buboy Fernandez ug international matchmaker Sean Gibbons miingon nga mas maayo kon sila si Danny o Mikey Garcia ang sunod atubangon ni Pacquiao.
Si Fernandez miangkon nga may katungod nga mamili si Pacquiao ug likayan ang mga batan-on ug kusog nga mga boksidor sa welterweight division tungod kay usa na kini ka boxing legend nga nagpangedaron og 41-anyos.
"He is close to 41. What we need to do is protect him and his career," matud pa ni Fernandez sa The Philippine STAR, ang igsuong mantalaan sa Banat News.
Miangkon si Gibbons nga dakong risgo ang iparang si Pacquiao batok sa 29-anyos nga si Spence, kinsa giisip nga usa sa mga kusog nga boksidor sa iyang dibisyon.
Nagtuo si Fernadez nga delikado nga mahimong taytayan ni Spence si Pacquiao aron mosikat pagmaayo.
"If we beat Spence, what will we gain? And what would happen if he ends up beating Manny," matud pa niya.