CEBU, Philippines — Gusto si Blackwater Elite coach Aris Dimaunahan nga kompleto siya sa hinagiban sa ilang sangka sa multi-titled San Miguel Beermen sa quarterfinals karong semanaha.
Ang Blackwater mikandado sa No. 3 human sa ilang kadaogan batok Alaska Aces niadtong Domingo diin aduna sila'y rekord nga 7-4.
Si Dimaunahan miingon nga bisan pa og sila ang mas taas og standing, gitan-aw gihapon niya nga underdog sila batok sa sixth seed nga San Miguel (5-5).
Tungod kay ang Beermen ang ilang ikabangga, ang Elite napugos pag-ilis og import diin ilang gipulihan si Staphon Blair ug gikuha ang kanhi NBA bigman nga si Greg Smith.
Si Smith nga miduwa kaniadto sa Minnesota Timberwolves, gilauman sa Blackwater nga mopugong sa mangtas nga si Chris McColluogh, kinsa mi-average og dul-an sa 35 puntos uban sa San Miguel. (BANAT NEWS)