CEBU, Philippines — Kon ang kanhi Gilas coach nga si Rajko Toroman ang pangutan-on, ang Angola ra iyang nakita mapilde sa Pilipinas sa group stage sa FIBA World Cup sa Agosto didto sa China.
Si Toroman nga maoy coach sa Gilas niadtong tuig 2011 hangtod sa 2014, miingon nga milambo na ang Gilas, apan wala kini mabuligi og suwerte kay napunta sila sa lig-on nga bracket sa World Cup.
Ang Gilas makigsangka sa Italy ug dayon sa Angola ug Serbia atol sa group stage diin kinahanglan nila nga modaog og kaduha aron moabante sa second round.
Ang Serbian nga si Toroman miingon nga imposible nga modaog ang Gilas sa Serbia tungod kay gitan-aw kini karon nga usa sa mga lig-on nga karibal sa Team USA alang sa kampiyonato.
Usa ka upset lang usab ang tsansa sa Gilas sa Italy nga gibitoonan usab og mga NBA stars sama ni Danilo Gallinari sa Los Angeles Clippers. Ang Italy usa sab sa mga labing lig-on nga koponan gikan sa Europe.