CEBU, Philippines – Miapil na karon ang NBA players sa mihatag sa ilang reaksiyon sa kalabot sa pagpanglamparo ni Phoenix Fuel Masters cager Calvin Abueva ngadto sa import ug kanhi NBA standout nga si Terrence Jones.
Ang sentro sa Golden State Warriors nga si Andrew Bogut wala mahimuot sa gibuhat ni Abueva ilabi na nga daan na nga naglungot-lungot ang Australian players ngadto kaniya tungod sa kalambigitan niini sa rambol tali sa Gilas Pilipinas ug Australia sa miaging tuig.
"The resume continues building for this fella," matud pa ni Bogut sa iyang social media account.
Ang NBA veteran miingon nga kinahanglan nga makontrol sa Philippine basketball si Abueva tungod sa makadaot nga batasan niini sulod sa korte.
Sama ni Bogut, ang Denver Nuggets point guard nga si Isaiah Thomas wala mahimuot ni Abueva nga iyang gihulagway nga hugaw nga player.
Ang kanhi NBA All-Star miingon nga kun siya pa ang gihimoan ni Abueva, hayan nga makatilaw kini og leksiyon.
Si Thomas suod nga higala ni Jones dihang nagduwa pa ang naulahi sa NBA.