CEBU, Philippines – Ang Team ASPA ug VDrink Malunggay Juice mitagak sa tagsa-tagsa nila ka mga kontra aron pagmartsa ngadto sa semifinal round sa Monday Squad Basketball Cebu (MSBC) Friendship Cup Season 5 diha sa Casals Village gym sa Barangay Mabolo, Dakbayan sa Sugbo.
Si JR Bucatan mihipos og 18 puntos sa dihang gilampaso sa ASPA ang Rams,74-45, samtang si playing team owner John Cabahug mipabuto og 23 puntos aron pangulohan ang VDrink ngadto sa makutas nga daog, 75-71 sud sa overtime batok sa Silogan Ni Gian aron angkonon ang katapusang luna sa semis ning torneyo nga gipaluyohan sa San Remigio Beach Club, VDrink, F45 Training-Cebu Business Park ug Silogan Ni Gian.
Mitampo si John Cesa og 16 puntos, samtang sila si Rumar Ponce ug Jun Aclan nagkumboya'g 25 puntos alang sa ASPA nga mipabarag dayon sa Rams pagsugod pa lamang sa duwa gamit ang makabungog nga 22-7 rally.
Gitiwasan sa ASPA ang Rams sa final half, 41-26 aron paglubong niini sa Rams og 29 puntos.
Sa laing bahin, si Cabahug giabagan nilang Ryan Llanos ug Archie Batua nga nagkumbinar og 22 puntos alang sa VDrink.