CEBU, Philippines — Gipakita ni undefeated heavyweight Deontay Wilder nga usa siya sa mga hari sa heavyweight division human sa iyang bangis nga first round knockout nga kadaugan batok ni Dominic Brezeale kagahapon didto sa New York.
Si Wilder, kinsa giisip nga usa sa mga labing kusug sa heavyweight division, mipatugpa og bug-at nga right hook sa ulo ni Breazeale kinsa daling nalup-og og wala na kabangon pa sa ihap sa referee.
Sa maong kadaugan, ang kanhi Olympian nga si Wilder mipasaka sa iyang rekord ngadto sa 41-0, 40KOs, samtang si Breazeale nakatilaw sa ikaduha niyang pilde sud sa 22 ka away.
Sa wala pa ang sangka, si Wilder giuwan og mga pagsaway gikan sa mga sports fans ug media tungod sa iyang pamahayag nga dili siya manumbaling kun ugaling mapatay niya iyang kontra ibabaw sa ring.
Sa maong kadaugan, mikusug pagmaayo ang syagit alang sa dugay nang gihandum nga blockbuster fight nila sa Briton ug laing heavyweight champion nga si Anthony Joshua.
Pulos way pilde, si Wilder maoy nanag-iya sa WBC championship, samtang si Joshua maoy naghupot sa IBF, WBO ug WBA belts.