BJ Pepito, Adlawan nagsaw sa dungog
CEBU, Philippines — Gisaw-an sa duha ka tadhan nga Sugboanong riders nga sila si BJ Pepito ug Jonjon Adlawan ang dungog human gidominar ang tagsa-tasga nila ka dibisyon sa 21st Calambua Motocross Cup nga gipasiugdahan sa MS Motosuit niadtong weekend didto sa Barangay Calambua, lungsod sa San Remigio amihanang bahin sa Sugbo.
Si Pepito nga gibansagan og 'Wonder Boy' gikan sa Daanbantayan gumikan sa iyang kapaspas sa racetrack, mipakita og igong katakus pagmaneho sa iyang motorbike bisan pa sa kalisud sa rota dayon na ngadto sa pagsakmit sa titulo sa expert category.
Ang 17-anyos nga si Pepito nga kanhi gipasidunggan isip 'Rider of the Year' sa MS Motosuit Motocross Series, mitabok sa finish line nga nag-una sa sikit niyang karibal nga si Adlawan, samtang si Denmark Supatan maoy nalandig sa ikatulong dapit.
"I am always inspired in every race because of the all-support of my parents. My dad Bill, who is my chief mechanic, coach and mentor wrapped in one, and of course my mom Malou Pepito, who is my number one fan. Seeing her cheering for me every step of the way gives me added energy in the racetrack," matud pa ni Pepito.
Ang pambato sa Team BP8 nasipyat hinuon pagdaog og double championship gumikan kay napilde siya ni Adlawan sa pro open class. Nagkabaylo sila og puwesto ning higayon diin si Adlawan maoy first ug gisundan ni Pepito, samtang si Supatan nalansang gihapon sa ikatulo.
Doble ang selebrasyon ni Adlawan kay ang iyang amahan nga si Jonas mao man ang naghari sa Executive A. Lain pang mga mananaog sa executive division mao sila si Arnel Enriquez (B) ug Rex Gamallo (C).
Mikuha sab og atensiyon sila si Earljun Codinera, Brylle Ornopia, John Hisoler ug Rio Mahinay.
Nilang tanan, bugtong si Codinera lamang ang nakalangkat og duha ka titulo pinaagi sa intermediate ug novice open production.
Si Ornopia maoy nanghawod sa beginners production, si Hisoler sa local enduro ug si Mahinay sa open enduro.
Nagkumpleto division winners mao sila si Rajah Garin (mini class 85cc), Lhaz Nadela (mini class 50cc), Sharlet Gallarde (ladies), Eric Gabuya (underbone) ug Rey Pepito (buggy). (BANAT NEWS)
- Latest
