CEBU, Philippines — Ang Kenyan nga si Joseph Mururi ug ang Cebu-based Mindanao long distance runner nga si Ruffa Sorongon mi-angkon na gyud sa korona nga midakin-as sa ilang mga kamot sa miagi nilang pagsalmot sa 42-kilometer category human sila maoy nanghawod sa 2019 Cebu City Marathon sa Cebu Business Park kagahapon.
Si Mururi nga ikaupat lamang sa labing una niyang pag-apil sa lumba niadtong 2016, mibalik sa Sugbo ug ning higayona nagmalampuson sa pagbira sa men's open title sud sa duha ka oras, 39 minutos ug 44 segundos.
Nalandig sa ikaduhang puwesto si Bryan Quiamco sa oras nga 2:40:06, usa ka segundo lamang ang ilang gintang ni third placer Noel Tillor. Mipatong sa ikaupat ug ikalimang dapit mao sila si Azlan Pagay (2:44:45) ug Takumi Tamura (2:48:16).
Sa iyang bahin, si Sorongon maoy gikoronahang hara sa women's 42K sa pagrehistro niini sa labing paspas nga oras nga 3:29:30.
Mao kini ang ikatulong higayon nga si Sorongon mikumbati sa Cebu Marathon, apan labing unang higayon nga siya midaog.
Nagsunod ni Sorongon si Evamie Villarin sa oras nga 3:30:13. Si Sandra Sollano maoy third sa oras nga 3:52:25 ug gisundan kini nilang Kay Razal Cundangan (3:58:24) ug Rona Lacancale (4:01:09).
Lain pang mga mananaog mao sila Joseph Emia (1:14:51) ug Melody Perez (1:35:36) sa 21K ug Alfrinz Braza (18:14.5) ug Karen Manayon (22:49) sa 5K. (BANAT NEWS)