Tatluhan Open Chess Tournament kasado na karong weekend sa Robinsons Galleria

CEBU, Philippines – Han-ay na ang tanan alang sa Salon de Rose Tatluhan Open Chess Tournament karong weekend diha sa Barracks Chess Club sa Robinsons Galleria Cebu.

Ang Cebuano chess players angayan nga mangandam sa usa ka lisud nga hagit gumikan kay mga out-of-town players gikan sa Tacloban, Bohol ug Dumaguete ang mikompirma na man sa ilang partisipasyon ning duha ka adlaw nga torneyo nga gipaabot nga makahakot og 30 ka teams.

Ang Cebu Executives and Professionals Chess Association moparada sab og usa ka lig-ong koponan sa tinguha nga kaluhaan ang nadaog nilang kampiyonato sa bag-o lang natapos nga Boy Pestaño Tatluhan Tournament, matud pa ni CEPCA founding member Jun Olis.

Matag team langkuban og tulo ka players nga dunay average National Chess Federation of the Philippines (NCFP) rating nga 2500.

Ang makampiyon mobulsa og P20,000, ang second modawat og P12,000, samtang ang mopahiluna sa ikatulo hangtod sa ikalimang dapit mokubra og P8,000, P5,000 ug P3,000.  

Si US-based Cebuano Grandmaster Enrico Sevillano ug ang iyang stepson nga si International Master John Daniel Bryant nagplano sab nga moapil o dili ba motambong lamang sa event nga gisuportaan ni chess patron Benjamin 'Bojie' Lim.

Ang entry fee nagkantidad og P1,000 sa mga early registrants ug P1,200 sa on-site. Alang sa dugang detalye,  niadtong interesado mahimong mokontak ni FIDE Arbiter Marvin Y. Ruelan (0926-7352951) o ni Mona Yap (0923-2366986).