CEBU, Philippines – Ang Fil-Am nga si Jordan Clarkson mipabuto og 28 puntos aron pangulohan ang Cleveland Cavaliers ngadto sa 113-106 nga kadaogan batok sa New York Knicks sa NBA kagahapon didto sa Quicken Loans Arena sa Cleveland, Ohio.
Wala sab magpabitin si Rodney Hood nga mikolekta og 23 puntos, apil na ang iyang itsa nga nakapalabaw sa Cavs sa hingpit, 107-106 sa nahibilin nga 23 segundos sa duwa.
Duna unta'y tsansa ang Knicks nga mailog ang labaw, apan nasipyat ang duha ka free throws ni Emmanuel Mundiay.
Sila si Cedi Osman ug Larry Nance Jr. milansang dayon og tagurha ka free throws aron pagselyo sa ikapitong daog sa Cavs nga giatbangan og 21 ka pilde.
Ang rookie nga si Collin Sexton mibahog og 19 puntos, samtang si Matthew Dellavedova mihipos og 15 puntos sa labing una niyang duwa sa Cleveland human siya nakuha og balik sa Cavs gikan sa Milwaukee Bucks pinaagi sa trade.
Sila si Enes Kanter ug Tim Hardaway mikulit og 20 puntos matag usa alang sa Knicks nga nakatilaw sa ikalima nilang sagunson nga pilde hinungdan nga natagak sila ngadto sa 8-21.