CEBU, Philippines — Gilihok na karon sa kadagkoan sa Los Angeles Lakers ang usa ka trade deal aron makuha nila ang beteranong si Trevor Ariza gikan sa Phoenix Suns.
Si Ariza usa ka kasaligang veteran ug defender ug gusto sa Lakers na mabira kini aron makatabang sa paglambo sa ilang mga batan-ong wingmen sama nila ni Brandon Ingram ug Kyle Kuzma.
Wala pa mahingpit ang trade, apan dako og posibilidad nga mouyon ang Suns ilabi na nga upat pa lang ang ilang daog sa 26 nila ka duwa.
Ang 33-anyos nga si Ariza, niduwa kaniadto sa Lakers nga nikampiyon niadtong tuig 2009 uban nila ni Kobe Bryant ug Pau Gasol.
Si Ariza nag-average og 9.7 points ug 5.5 rebounds, apan dako siya og matampo sa paglig-on pa sa kampanya sa Lakers ubos sa liderato ni LeBron James.
Ang Lakers nahimutang karon sa ikalimang dapit sa West sa ilang 16-10 win-loss record.