CEBU, Philippines – Hukman kung andam na ba si ALA Boxing Gym prospect Jeo 'Santino' Santisima (16-2, 14KOs) nga mohimo og kampaniya alang sa world title sa iyang pakigsangka sa Mehikano nga si Uriel 'Yuca' Lopez (13-6, 6KOs) sa main event sa 'Pinoy Pride 45: Quest for Greatness' fight card ugma sa gabii didto sa IEC Convention Center.
Si Santisima kinsa manalipod sa iyang WBO Oriental super bantamweight title gihulagway ni ALA Promotions President Michael Aldeguer isip usa sa mga world title prospect sa nasud, apan kinahanglan una niya kini pamatud-an batok ni Lopez.
Miingon si Aldeguer nga gihatagan niya si Santisima og Mehikanong kaatbang aron masukod gyud ang abilidad sa iyang boksidor.
"There is a lot at stake for Jeo in this fight. He is now ranked 15 by the WBO and the goal is to make it to top 10 and eventually wait for a shot at the world title, but he must hurdle pass this test first," matud pa ni Aldeguer atol sa final press conference kagahapon didto sa Summit Circle Cebu Hotel.
Sa supporting bouts, sila si 'Prince' Albert Pagara ug Kevin Jake Cataraja makigsangka batok sa tagsa-tagsa nila ka mga langyaw nga kaatbang.
Si Pagara (30-1, 21KOs) makigsangka ni George Krampah (14-3, 12KOs) sa Accra, Ghana, samtang ang undefeated nga si Cataraja (8-0, 7KOs) makigbinukbukay sa laing Mehikano nga si Hugo 'Scarface' Reyes (9-1, 7KOs). (BANAT NEWS)