CEBU, Philippines — Duha ka bulan sa dili pa ang ilang sangka, si Adrien Broner mipadayag na sa iyang kaandam nga makighilam-osay og kumo batok ni WBA welterweight champion Manny Pacquiao.
"I will be war ready," matud pa sa 29-anyos nga si Broner sa iyang Instagram nga iyang giapilan og video nga nagpakita sa iyang training.
Si Broner nga usa ka four-division world champion mikompirmar sa away nilang Pacquiao karong Enero 19 didto sa Las Vegas gamit ang mga hashtag nga "MannyVsAB ug #VegasJan19 sa iyang social media.
Sa laing bahin, ang notadong boxing trainer ug analyst nga si Teddy Atlas nagkanayon nga si Broner usa ka boksidor, kansang kalibre makahatag og malisud nga hagit ni Pacquiao.
Matud pa ni Atlas nga si Broner dili si Lucas Matthysse nga yanong gipalukapa ni Pacquiao sa ikapitong hugna aron sakmiton ang WBA title niadtong Hulyo 15 didto sa Kuala Lumpur, Malaysia.
"I don't know how much Pacquiao has left but you might find out in the Broner fight because Broner is young enough, physical enough, talented enough and fast enough", matud pa ni Atlas.