CEBU, Philippines — Bisan walay mipakitang sidlak sa adlaw ug nakaulan pa gani, wala kini makapugong sa tinguha ni Jessie Abelgos pagmina og bulawang medalya sa unang adlaw sa 23rd Milo Little Olympics Visayas Finals kagahapon diha sa Cebu City Sports Center.
Si Abelgos, Grade-12 student sa Sisters of Mary School-Boystown maoy naghari sa 5000 meter secondary boys gold dihang mikulit siya og personal best time nga 17:19 mas paspas pa sa natala niyang oras sa miaging tuig nga 17:57.
Gipuhalan ni Abelgos si Jemar Morales sa Abellana National School nga mioras og 17:36 alang sa ikaduhang dapit ug Dave Nicole Navio sa University of San Carlos-BED sa oras nga 18:01.
Sa laing bahin, gipakita sa mga atleta sa University of Cebu (UC) nga seryoso sila pagsakmit og balik sa overall championship sa Milo Little Olympics Visayas Finals dihang ang ilang mga pambato sa gymnastics ug athletics mikabkab dayon og 10 ka gold, unom ka silver ug tulo ka bronze medals.
Ang managsuong Eugene Ginell ug Euricka Soronio maoy nangulo kinsa midaog og gold ug silver sa secondary girls division.
Giharos sab sa UC ang elementary gymnastics competition kortesiya ni Geanne Alexis Rallos.
Sa athletics, si Mart Chan Toregosa nidominar sa secondary boys 400m run sa oras nga 53:42, samtang ang iyang teammate nga si Crystal Villanueva maoy naka-gold sa girls secondary high jump sa iyang 1.30m mark.
Sila si Jake Dagatan ug Krystelle Leyson mitunol og tag-usa ka silver pinaagi sa high jump ug 100m hurdles event.
Ang Sacred Heart School-Ateneo de Cebu ug Taytung School sa Bacolod City aduna tagduha ka golds sa secondary division, samtang nag-una sa elementary division standing ang Ormoc Immaculate School sa ilang duha ka golds ug usa ka silver.
Ang Talamban Elementary School nimina sab og duha ka bulawan, samtang ang Cebu Institute of Technology-University mihipos og usa ka gold ug usa sab ka silver.