Cebu City Sharks misukarap giihaw sa Gensan Warriors

CEBU, Philippines – Human mikadlit og makasaysayanong daog batok sa Batangas City Athletics aron putlon ang upat ka sagunson nilang pilde, ang Cebu City Sharks misukarap sab dayon og balik.

Ang Sharks  giihaw sa GenSan Warriors, 66-70 sa nagpadayong   2018 Maharlika Pilipinas Basketball League (MPBL) Anta Datu Cup niadtong Huwebes sa gabii didto sa STRIKE Gymnasium sa Bacoor, Cavite.

Mao kadto ang ikaduhang sunod-sunod nga pilde sa Cebu ug ikaunom sa kinatibuk-an sud sa pito ka duwa hinungdan nga nagtingkagol karon ang Sharks sa kinailawmang bahin sa liderato uban ang Pasig Pirates nga wala pa'y daog sa unom ka duwa.

Lain na sab kadtong pait nga kapakyasan sa Sharks nga nakabawi unta human malubong og 12 puntos sa katapusang tres minutos sa duwa, apan nabaraw sa pagkamabayanihon ni Leomer Losentes sa GenSan.

Alkansi sa iskor nga 50-62 sa nahibiling 3:09, sila si Patrick Jan Cabahug ug Garex Puerto milusad og 10-1 rally hinungdan nga nakasikit ang Sharks ngadto na lang sa dos puntos, 61-43 sa nahibiling 40 segundos.

Apan daw sa gipabugnaw ni Losentes ang Cebu human siya milansang og  tres  nga nakapaginhawa og lawom sa GenSan sa iskor nga 66-61 sa nahibiling 24 segundos.

Katapusang misikit ang Sharks sa iskor nga 66-68 human sa jump shot ni Rhaffy Octobre sa katapusang 11 segundos gumikan kay si Losentes kalmadong mipasud sa krusyal niyang free throws sa nahibiling singko segundos aron pagsilyo sa kulbahinam nga daog sa GenSan.

Si Losentes adunay 15 puntos, lima ka rebounds ug tulo ka assists alang sa GenSan. Si Delmar Mahaling mi-iskor sab og 15 uban ang walo ka rebounds, samtang si John Orbeta miamot og 13 puntos alang sa Warriors nga nagbitbit na karon og 2-4 record.

Si Cabahug mitapos uban ang 21 puntos ug tulo ka rebounds alang sa Sharks nga manulong sa Imus Bandera karong Septiyembre 4 didto sa Imus Sports Complex sa Cavite.